இல்லத்தரசிகள் மகிழ்ச்சி!! அதிரடியாக குறைந்த தக்காளியின் விலை!!

காய்கறிகளின் விலை அந்தந்த கால நிலைக்கு ஏற்ப ஏறி இறங்குவது வழக்கம். அதிலும், தக்காளி, வெங்காயத்தின் விலை குறைவாக இருந்தவாறே இருக்கும் நிலையில் திடீரென எகிறிவிடும். கடந்த இரண்டு மாதங்களுக்கு முன்பு தக்காளி பழம் கிலோ ₹5 வரை விலை குறைந்து விற்கப்பட்டது. கடந்த சில தினங்களாக தக்காளி பழங்களின் விலை கிலோ ₹100 வரை சத்தமில்லாமல் அதிகரித்து காணப்பட்டது.

சென்னை கோயம்பேடு சந்தையில் சில்லறை விலையில் தக்காளி பழம் கிலோ ₹100 ரூபாய்க்கு விற்பனை செய்ததால் பொது மக்களிடையே பெரும் அதிர்ச்சியை ஏற்படுத்தி வந்தது. இந்நிலையில், 65 பண்ணை பசுமை நுகர்வோர் கடைகளில் குறைந்த விலைக்கு தக்காளி விற்கப்பட்டு வந்தது.

இந்நிலையில், தக்காளியின் வரத்து அதிகரித்துள்ளதால் சென்னை கோயம்பேடு சந்தையில், தக்காளி கிலோ ₹50 வரை குறைந்து கொள்முதல் விலையிலேயே விற்கப்படுகிறது. உள்ளூர் மற்றும் வெளி மாநிலங்களில் இருந்து வரத்து அதிகரிப்பால் தக்காளி விலை குறைந்துள்ளது என்று வியாபாரிகள் சார்பில் கூறப்பட்டுள்ளது.