மாணவர்கள் உற்சாகம்!! அனைத்து அரசு தொடக்கப் பள்ளிகளிலும் காலை உணவு விரிவாக்கம்!!

தமிழ்நாடு முழுவதும் உள்ள அனைத்து அரசு தொடக்கப் பள்ளிகளிலும் மாணவர்களுக்கு முதல்வரின் காலை உணவு திட்டம் விரிவாக்கம் செய்யப்படும் என்று நேற்று காலை பட்ஜெட் தாக்கல் செய்து நிதிநிலை அறிக்கையை வாசித்த நிதி அமைச்சர் பி.டி.ஆர்.பழனிவேல் தியாகராஜன் அறிவித்தார். இந்த திட்டத்தின் விரிவாக்கத்திற்கு ₹500 கோடி ஒதுக்கீடு செய்யப்பட்டுள்ளதாக நிதியமைச்சர் பி.டி.ஆர்.பழனிவேல் தியாகராஜன் அறிவித்துள்ளார்.

நேற்று காலை 10 மணிக்கு தமிழ்நாடு சட்டப்பேரவை கூட்டம் தொடங்கியது. 2023 - 24 ஆம் நிதியாண்டுக்கான நிதிநிலை அறிக்கையை தமிழ்நாடு சட்டப்பேரவையில் நிதியமைச்சர் பி.டி.ஆர்.பழனிவேல் தியாகராஜன் தாக்கல் செய்து உரையாற்றினார்.

அதில், பள்ளி கல்வித்துறை தொடர்பான அறிவிப்புகளை வெளியிட்ட நிதி அமைச்சர், முதல்வரின் காலை உணவு திட்டம், ₹500 கோடி செலவில் 18 லட்சம் மாணவர்கள் பயன்பெறும் வகையில் அனைத்து அரசு தொடக்கப் பள்ளிகளிலும் விரிவுபடுத்தப்படும் என்று அறிவித்தார்.

அதை தொடர்ந்து, பேராசிரியர் அன்பழகன் பள்ளி மேம்பாட்டு திட்டம் தொடங்கப்படும். புதிய வகுப்பறைகள், ஆய்வகங்கள் கட்ட ₹1,500 கோடி நிதி ஒதுக்கீடு செய்யப்பட்டுள்ளது. ஆதிதிராவிடர், சீர்மரபினர், அறநிலையத் துறை உட்பட அனைத்து துறைகள் நடத்தும் அனைத்து பள்ளிகளும் பள்ளிக்கல்வி துறையின் கீழ் கொண்டுவரப்படும். மேலும், நான் முதல்வன் திட்டம் மூலம் இதுவரை 12.7 லட்சம் மாணவர்கள் பயிற்சி பெற்று வருகின்றனர். ஒட்டுமொத்தமாக பள்ளி கல்வி துறைக்கு 40,290 கோடி ஒதுக்கீடு செய்யப்பட்டுள்ளது என்றும் அவர் அறிவித்தார்.